Azər Mehtiyev: Yaxın perspektivdə devalvasiyaya gözlənilmir
“TURAN” Agentliyinə müsahibə
“TURAN” Agentliyinə müsahibə
2018 Aprel 23
Son günlər bəzi banklarda dollar alış-satışında problemlər yaşanır. Bu isə əhali arasında bəzi söz-söhbətlərə səbəb olub. İnsanlar arasında devalvasiya olacağı ilə bağlı qeyri-rəsmi xəbərlər dolaşır. Məsələyə Mərkəzi Bank rəhbərliyi tərəfindən aydınlıq gətirilsə də, bu insanlar arasında devalvasiya söz-söhbətini azaltmayıb. Bəs doğrudanmı yaxın vaxtlarda devalvasiya ola bilərmi? Devalvasiyaya zərurət varmı? İqtisadçı ekspert Azər Mehdiyev mövzu ilə bağlı suallarımızı cavablandırır.
- Azər bəy, xeyli müddətdir ki,
banklarda dollar satışı ilə bağlı problemlər yaşanır. Banklar ya dollar
satmaqdan imtina edirlər, ya da dolları müəyyən limitlə təklif edirlər. Bu da
əhali arasında ajiotaja səbəb olub. Sizcə, bu nə ilə əlaqədar ola bilər? Belə
söz-söhbət gəzir ki, bu devalvasiya ilə əlaqədardır. Bu söz- söhbət reallığa
çevrilə bilərmi?
- Əvvəlcə ondan başlayaq ki, bu devalvasiyanın
olacağı ilə bağlı söz-söhbətlər nədən qaynaqlanır? Məşhur bir məsəl var:
"İlan vuran ala çatıdan qorxar.". Son illər Azərbaycanda xüsusilə
iqtisadi sferada manatın başına gələn prosesləri götürsək, insanlar hələ bunun
həyəcanını yaşayırlar, bunun təsiri altından çıxmayıblar. Azərbaycanda bir
realllıq var ki, hər zaman siyasi proseslərdən sonra nəyinsə baş verəcəyini
gözləyirlər. Diqqət etmisinizsə, hər zaman seçkidən sonra qiymətlərin
bahalaşacağı ilə bağlı söhbətlər gəzir. 2015-ci ildəki devalvasiyadan sonra
artıq bu söz-söhbətlər devalvasiya olacağına dair söhbətlərə çevrilib. Xüsusilə
seçkinin vaxtının dəyişdirilməsindən sonra belə şərhlər yayılmışdı ki, guya
ilin ikinci yarısında vəziyyət gərginləşəcək.
İqtisadi vəziyyətin
gərginləşəcəyini nəzərə alan hökumət seçkini irəli çəkib. Yəni bu cür söhbətlər
və nəhayət son vaxtlar Rusiyaya qarşı sanksiyaların tətbiqi, Suriya ətrafında
baş verən proseslər, türk lirəsinin və rus rublunun dəyərdən düşməsi
prosesləri, ayrı-ayrı bu kimi hadisələr insanlarda belə bir fikir formalaşdırıb
ki, bütün bunlar Azərbaycana da təsirsiz ötüşməyəcək. Bir tərəfdən əhali
arasında gəzən bu söz-söhbətin siyasi seçkilərlə üst-üstə düşməsi müəyyən qədər
əhalinin gözləntilərini formalaşdırıb. Bu gözləntilərdən ilk əvvəldə çox ciddi
bir məsələ var. Burda hökumətin sözünə etimadsızlıq, hakimiyyət qurumlarına
inamsızlıq olduğu görünür. Çünki əgər 2015-ci ildə ilk devalvasiyada əvvəl
Mərkəzi Bankın rəhbərinin "devalvasiya olmayacaq" deməsindən dərhal
sonra, bu baş verirsə, əhali istər-istəməz bu proseslərdən bir nəticə çıxarmağa
meylli olur. Və hamı öz işini ehtiyyatlı görməyə çalışır, məbləğindən asılı
olmayaraq malik olduğu vəsaiti sığortalamaq istəyirlər. Əllərində manat vəsaiti
olan insanlar onu dollara çevirməyə çalışır. Çünki 2015 və 2016-ci illərdə olan
qeyri-sabit proseslərdən sonra 2017-ci ildə manatın sabitliyinin təmin olunması
gərginliyi nisbətən aradan qaldırmış və iqtisadi proseslərdə dollarlaşma səviyyəsi
xeyli azalmışdı. Amma növbədənkənar seçkilərlə bağlı yaranan söz-söhbət
devalvasiya ola biləcəyi ehtimallarını da müzakirələrə gətirdi. Ən pisi isə
odur ki, bəzən bu cür panik şərait yaradanlar bundan real olaraq qazanmaq
istəyənlər ola bilər. Yəni əllərində resurs olanlar, valyuta əldə etmək istəyən
müəyyən qruplar bu və ya digər şəkildə bundan faydalanmağa çalışıra bilərlər.
Beləliklə, burda bir sıra amillər üst-üstə gəlir. Etimadsızlıq faktorundan
tutmuş, siyasi proseslər, qonşu ölkələrdə baş verənlər və bu hadisələrdən gəlir
əldə etmək düşüncəsində olan insanlar- bu cür hadisələrin üst-üstə düşməsi ilə
nəticələnən panik vəziyyət sonda insanların gözləntilərini, xüsusilə
devalvasiya olacağına dair gözləntisini yaradır. Təbii ki, belə olan halda da, valyutaya
tələbatın artması baş verir. Həm də bu zaman proseslərin baş verdiyi təqvim
dövrü də nəzərə alınmalıdır: adətən Novruz bayramları tətilindən sonra və
ikinci rübün başlanğıcında iqtisadi fəallığın güclənməsi baş verir, xarici
valyuta ilə mal alıb, satanların dollara tələbatının artması müşahidə olunur.
Son aylar bankların da valyuta alışına maraqlarının artması müşahidə olunur:
onlar valyuta aktivlərini artırırlar. Bütün bunlar devalvasiyaya gətirib çıxara
bilərmi? - kimi sualı olarsa, ilk növbədə, manatın sabitliyinin iqtisadi və
siyasi əsaslarına baxmaq vacibdir.
- Hazırda manatın devalvasiya üçün
iqtisadi əsası varmı?
- İqtisadi proseslərin mövcud durumu, ölkənin
valyuta ehtiyatlarının məbləği, neftin dünya bazar qiyməti və ölkənin tədiyə
balansının durumuna əsasən deyə bilərik ki, yaxın aylarda devalvasiyaya gətirib
çıxaracaq durum yoxdur. Ancaq 2014-cü ilədək olan dövrlə müqayisədə hazırda
ölkədə valyuta axınlarına və valyuta rejiminə daha ciddi nəzarət olunur.
İqtisadi fəallığın məhdudlaşması və valyuta rejimində edilən dəyişikliklər
ölkədən valyuta axınlarını məhdudlaşdırıb. Aydındır ki, hələ də Azərbaycanda
milli valyutanın möhkəmliyini təmin edən əsas amil neft gəlirləri, yəni neftin
dünya bazar qiymətinin səviyyəsidir. Ölkənin valyuta gəlirləri yenə də əsasən
neft və təbii qaz ixracından əldə olunur. Məsələn, 2017-ci ildə 13.8 mlrd.
dollarlıq ixracın 12.2 mlrd. dolları (88.4%-i) xam neft, neft məhsulları və
təbii qaz hesabına olub. Ötən il idxal isə 8.8 mlrd. dollar məbləğində olub ki,
bu da qeyri-neft ixracından 5.5 dəfə çox deməkdir. Bununla belə, ötən ilin
sonunda ölkənin xarici ticarət dövriyyəsində 5.0 mlrd. dollarlıq müsbət saldo,
tədiyə balansında isə 1.6 mlrd. dollarlıq profisit yaranıb. Ötən ilin sonunda
Mərkəzi Bankın valyuta ehtiyatlarında artım baş verib və ilin sonuna 5.3 mlrd.
dollar olub. Azərbaycan Respublikası Dövlət Neft Fondunun (ARDNF) aktivləri isə
ilin sonuna 38.8 mlrd dollar təşkil edib. Bu ilin ilk rübündə də neftin dünya
bazar qiyməti kifayət qədər yüksək olub: hər barrelə üçün 50-70 dollar arasında
dəyişib. İlin birinci rübündə ölkədən ixracın məbləği (3.4 mlrd. dollar - bunun
təqribən 3 mlrd. dolları neft və neft məhsulları) idxaldan 1.2 mlrd. dollar çox
olub. MB-nin valyuta ehtiyatlarında artım olub (martın sonuna 5.5 mlrd.
dollar). Deməli, xarici ticarət dövriyyəsinin və tədiyə balansının mövcud
durumu, ölkənin valyuta ehtiyatlarının miqdarı, hətta ölkənin xarici dövlət
borcu üzrə ödənişlər də nəzərə alınmaqla, narahatlıq yaradacaq bir məqam ortaya
qoymur. Ən vacibi neftin dünaya bazar qiyməti hazırda hökumət üçün çox sərfəli
səviyyədədir. Həm proqnozlara əsasən, həm də son vaxtlar dünayada baş verən
siyasi proseslər nəzərə alınarsa, yaxın aylarda neftin qiymətinin kəskin
azalacağı gözlənilmir. Bu da ölkəyə kifayət qədər valyuta axınını təmin edir.
Bu baxımdan neftlə bağlı məsələlər valyuta sabitliyi üçün əsas yaradır. Digər
tərəfdən, artıq qeyd etdiyim ki, ölkədən valyuta axınlarına və valyuta rejiminə
ciddi nəzarət olunur. Yeganə narahatlıq yaradan iqtisadi amil bizim qeyri-neft
sektoru üzrə əsas xarici ticarət tərəfdaşlarımız olan qonşu Rusiya və Türkiyədə
(habelə İranda) baş verən iqtisadi proseslər və onların milli valyutalarının
dəyər itirməsidir. Bu ölkələrdə milli valyutaların dəyər itirməsi xüsusən
Azərbaycandan olan ixracatçılar üçün problemlər yarada və ixracın azalmasına,
eyni zamanda bu ölkələrdən Azərbaycana idxalın artmasını stimullaşdırılmasına
gətirib çıxara bilər. Amma bunlar ölkəmizin valyuta ehtiyatlarına ciddi təhdid
yaradacaq səviyyədə olduğunu düşünmürəm. Amma, bununla belə, MB manatın bu
ölkələrin valyutalarına real effektiv məzənnələrində baş verən dəyişiklikləri
izləməli və zəruri addımlar atmalıdır. İqtisadi amillərdən savayı devalvasiyaya
siyasi amillər də səbəb ola bilər. Amma siyasi baxımdan da ölkədəki durum
kifayət qədər sabit görünür. Yəni yaxın dövrdə hər-hansı qeyri-adi və
gözlənilməz hadisələr baş verməzsə, mövcud siyasi amillərin də davalvasiya
yaratması mümkün deyil.
- Sizin də qeyd etdiyiniz kimi,
növbədənkənar seçkinin təyini və Mərkəzi bankın rəhbərinin bu yaxınlarda
devalvasiya ilə bağlı verdiyi açıqlama bu panikanı bir qədər artırıb. Elman
Rüstəmov dedi ki, manatı heç bir təhlükə gözləmir. Xatırladım ki, ilk
devalvasiyadan əvvəl də Mərkəzi bankın rəhbərinin belə bir açıqlama verməsinə
baxmayaraq 2 gün sonra onun dediyinin əksinin şahidi olduq. İndi də insanların
çoxu onun bu dəfəki fikirlərinin təşvişi altındadır. Bəlkə belə panikalar
yaratmaq kimlərinsə marağına xidmət edir? Ölkədə belə panik vəziyyətin
yaranmasından kimlərsə faydalanmaq istəyir?
- Mən bir sıra amilləri sadalayanda dedim ki,
cəmiyyətdə müxtəlif maraq qrupları mövcuddur. Həqiqətən dediyiniz amil,
devalvasiyadan 2 gün əvvəl Mərkəzi Bankın rəhbərinin devalvasiya gözlənilmir
deməsindən sonra bunun baş verənlərdən ciddi nəticələr çıxarılmalıdır. Hökumət
nümayəndələrinin çıxışlarında və xalqa müraciətlərində daha səmimi olmaları,
hər cür yalandan uzaq olmaları, çıxışları ilə əməllərinin üst-üstə düşmələri
etimad qazanmaq üçün çox önəmlidir. Etimad iqtisadi sabitlik üçün çox vacibdir.
Digər tərəfdən, hökumət dəqiq işlənmiş uzunmüddətli strategiyalar hazırlayıb
açıqlamaqla və bunlara doğru-düzgün əməl etməklə insanlar, xüsusilə investorlar
və bütünlüklə biznes üçün qeyri-müəyyənliyi aradan qaldıra bilir. Bunların hər
ikisi iqtisadi sabitliyik üçün nəmlidir. Bunlar olmadıqda isə, cəmiyyətdə olan
qeyri-müəyyənlikdən faydalanmaq istəyən maraq qrupları ola bilər ki, bunlar
zaman-zaman panik vəziyyətlər yaratmaqla bunlardan faydalanmağa cəhd edə
bilərlər. Dünya təcrübəsi göstərir ki, dövlət institutlarının zəif olduğu
ölkələrdə belə hallar çox olur. Azərbaycanda çox böyük resurslara malik və belə
panik durumlarda böyük qazanc əldə etməyə maraqlı olan qrupların olub-olmaması
ilə bağlı hər-hansı araşdırma ortada yoxdur. Amma MB və Maliyyə Bazarlarına
Nəzarət Palatası yaxud onların nəzarətində olan araşdırma qurumlarının bu
istiqamətlərdə araşdırmalar aparması, belə cəhdlərin qarşısının vaxtında
alınması üçün qabaqlayıcı tədbirlərin həyata keçirməsi lazımdır. Bu gün
vətəndaş cəmiyyətində, müstəqil araşdırmaçıların belə məsələləri araşdıra
biləcək qədər imkanı yoxdur.
- Azər bəy, manatı real şəkildə,
tənzimlənmə olmadan üzən məzənnə rejiminə buraxsalar, manatın real dəyəri nə
qədər olar?
- Bizim belə bir araşdırmamız olmadığına görə,
təəssüf ki, bu barədə dəqiq söz deyə bilməyəcəm. Ancaq bu gün manatın real
olaraq bazar tərəfindən tənzimləyə biləcək üzən məzənnəyə keçməsi üçün hələ
real şərait görünmür. Çünki iqtisadiyyatımız kifayət qədər şaxələnməyib.
İqtisadiyyatımız, xüsusilə ölkəyə valyuta gətirən ixracımız əsasən neft və
qazla bağlıdır. Neftin qiymətində baş verən dəyişkənlik mütləq şəkildə manatın
sabitliyinə özünün birbaşa təsirini göstərir. Manat üzən məzənnəyə yalnız o
halda keçə bilər ki, ölkə iqtisadiyyatı şaxələnmiş olsun: bir tərəfdən,
neft-qazla yanaşı digər məhsul və xdimətlərdən irihəcmli valyuta gəlirlərimiz
olsun, digər tərəfdən isə, qeyri-neft ixracınızla qeyri-neft idxalımız arasında
ciddi bir tarazlıq yaranmış olsun. Başqa sözlə, milli valyutanın taleyinin bir
(hətta bir neçə) ixrac məhslunun həcmindən və onun dünya bazar qiymətinini
dəyişikliklərindən yüksək dərəcədə asılı olduğu bir şəraitdə tam üzən məzənnəyə
keçid nəinki çox risklidir, hətta təhlükəli ola bilər: ən müxtəlif səbəblərdən
məzənnədə tez-tez sıçrayışlı dəyişikliklər baş verə bilər ki, bu da maliyyə
sabitsizliyi, yüksək inflyasiya və başqa mənfi nəticələr doğurmaqla
qeyri-müəyyənliyi artıra bilər.
- Ekspertlər əvvəllər deyirdilər ki,
hökumət manatın məzənnəsini saxlamaq üçün süni inzibati resurslardan istifadə
edir. İndi necə? Sizcə, yenə də həmin resurslardan istifadə olunurmu?
Ümumiyyətlə manatı bu formada qorumağa ehtiyac varmı?
- Əslində bu sualın cavabını da yuxarıda
vermişəm. Tam üzən məzənnəyə keçid üçün real şərait hələ yoxdursa, tənzimləmə
qaçılmaz olur. 2014-cü ilə qədər olan dövrdə ölkə böyük neft gəlirləri əldə
edirdi. Belə neft gəlirləri əsasən Neft Fonduna daxil olurdu. Amma həmin dövrdə
dövlət büdcəsi gəlirlərinin böyük hissəsi - yarıdan çoxunu Neft Fondunun
transferləri hesabına formalaşırdı. Neft Fonduna dollarla daxil olan vəsaiti
dövlət büdcəsinə transfer etmək üçün valyutanın manata çevrilməsi lazımdır.
Neft Fondu valyutanı bazarda satmalı idi ki, vəsait manatla dövlət büdcəsinə
köçürülsün. Bundan başqa, neft sazişlərində olan xarici podratçı şirkətlər də
mənfəət vergisi üzrə büdcəyə ödənişlərini etmək üçün valyuta satışına məcbur
idilər. Bazara bu qaədər valyuta çıxarılmasına rəğmən, bazarda bu qədər
valyutaya tələb olmurdu (xarici ticarət əlaqələrində olan şirkətlərin tələbi
dollar təklifindən çox aşağı olurdu). Nəticədə MB bazara çıxarılan dollaırn
əksər hissəsini almağa məcbur idi (əks təqdirdə, manat çox məhkəmlənə bilərdi)
və əslində MB-nin valyuta ehtiyatları buna görə sürətlə artmışdı. MB-nin bu
addımı ölkə iqtisadiyyatda "holland sindromu"nu daha dərin formada
baş verməsinin qarşısını almış oldu. Ancaq 2015-ci ildən sonra vəziyyət bir
qədər dəyişib: ölkəyə valyuta daxilolmaları azalıb və elə görünür ki, sanki
valyuta təklifi ilə ona olan tələb arasında kəskin "uçurum" yoxdur.
Üzən məzənnəyə keçid təklifi də, ola bilsin ki, bundan qaynaqlanır. Lakin,
yuxarıda da qeyd etdiyim kimi, hələ də ölkənin valyuta gəlirləri başlıca olaraq
neft hesabınadır və neftin dünya bazar qiymətlərindən olan yüksək dərəcədə
asılılıq qalmaqdadır. Üzən məzənnənin tətbiqi üçün şaxələnmiş və daha sabit
iqtisadiyyata malik olmaq vacibdir. Diqqət yetirmisinizsə, ötən il maliyyə
sabitliyinin təmin edilməsi üçün Mərkəzi Banka Neft Fondundan ciddi məbləğdə
vəsait ayrılmışdı. Həmin vəsait əsasən manatın məzənnəsinin qorunması üçün
nəzərdə tutulmuşdu. Bu il Neft Fondundan oxşar məqsədə vəsait ayrılmayıb.
Hazırda manatın məzənnəsinin sabit saxlanması üçün müəyyən inzibati
resurslardan istifadə qalmaqdadır və fikrimizcə, indiki halda bu qaçılmazdır.
İxracın şaxələnməsi, başqa sözlə, ölkəyə valyuta daxilolmalarının
çoxkanallılığı təmin edildikcə və neft gəlirlərindən asılılığın dərəcəsi
azaldıqca, habelə ölkə bazarlarında rəqabətqabiliyyətli yerli istehsal malları
artdıqca (hər cür malların kənardan alınması zərurəti aradan qalxdıqca)
məzənnənin inzibati tənzimlənməsi dərəcəsi də getdikcə azaldıla bilər.
Hiç yorum yok:
Yorum Gönder